Бројот на нуклеарните боеви глави во светот е намален на 16.300 оваа година, претежно поради намалувањата во САД и Русија, соопшти Стокхолмскиот меѓународен институт за истражување на мирот (СИПРИ).
Бројот на нуклеарните боеви глави се намалил за 970 за една година нагласува СИПРИ и додава дека станува збор за активни, складирани или боеви глави, кои треба да бидат уништени.
Двете најголеми нуклеарни сили, САД и Русија поседуваат вкупно околу 90 проценти од светскиот нуклеарен арсенал. САД има 7.300 боеви глави, а Русија осум илјади.
Се смета дека девет земји во светот поседуваат нуклеарно оружје, САД, Русија, Велика Британија, Франција, Кина, Индија, Пакистан, Израел и Северна Кореја.
САД, Русија, Велика Британија и Франција имаат вкупно околу четири илјади боеви глави, кои во активна состојба.
Институтот нагласува дека нуклеарните држави продолжиле да ги усовршуваат своите нуклеарни сили и системите за доставување на нуклеарното оружје до целта.
Според извештајот на СИПРИ, САД издвоиле 350 милијарди долари за поддршка и усовршување на нуклеарните сили во следните десет години, вклучувајќи и инвестиции за нови подморници, балистички ракети и бомбардери со голем дострел.
Индија и Пакистан продолжуваат да разработуваат балистички и крилести ракети и да произведуваат нуклеарни материјали за воени цели. Се смета дека Индија располага со меѓу 90 и 110 боеви глави, а Пакистан меѓу 100 и 120. Израелскиот арсенал остана на ниво од 80 боеви глави. Кина располага со 250 боеви глави, а Северна Кореја има меѓу шест и осум нуклеарни оружја, оценуваат експертите од СИПРИ.