Македонската машка ракометна репрезентација в недела во СЦ „Борис Трајковски“ го игра реванш натпреварот за пласман на Светското првенство во Катар 2015 година.
На првиот дуел Македонија во Атина ја совлада Грција со 27:25, но играта не беше на нивото на кое македонските ракометари ги играа последните натпреварувања. Но, сепак победата на гостински терен ќе треба да се потврди во Скопје.
– Имаме позитивна атмосфера и треба да дадеме максимум. Сакаме да прикажеме подобра игра отколку во Грција. Таму одигравме лошо, но се вративме со позитивен резултат. Со „една нога“ сме во Катар и треба да го потврдиме пласманот. Убаво е секогаш да се игра пред полни трибини и треба да помине се најкоректно. Грција беше добар домаќин и ние треба да се покажеме како добри домаќини, истакна репрезентативецот Филип Миркуловски.
Селекторот Ивица Обрван со истите 16 играчи ќе го одигра и реваншот в недела. Никола Маркоски и Петар Ангелов имаат повреди, а Наумче Мојсовски иако ја заврши рехабилитацијата нема да биде во составот за да не се ризикува.
Натпреварот Македонија – Грција се игра в недела со почеток во 20 часот.