Полициската станица „Чаир“ до надлежното Основно јавно обвинителство – Скопје со кривична пријава го предаде лицето Р.Н. (28) од село Режанце–Качаник, Република Косово, поради основано сомнение за сторено кривично дело „тешка кражба“ за што од страна на судија во претходна постапка му е одредена мерка притвор во траење од осум дена.
Како што информира Министерството за внатрешни работи, кривичното дело пријавениот го извршил на крајот од минатата година на подрачјето на Чаир во спортската обложувалница „Спорт Лајф“ лоцирана на ул. „Втора Македонска Бригада“ бб во времето од 22 до 08.00 часот. Со употреба на тврд погоден предмет ја скинал алката од вратата која со катанец била заклучена, а потоа и со физичка сила делувал на вратата при што ја отворил. Влегол внатре и од таму демонтирал три ЛЦД телевизори, меѓутоа успеал да одземе само два и еден мобилен телефон и го напуштил местото.
Од страна на екипа на СВР Скопје извршена е крим-техничка обработка, подигнати се траги од папиларни линии. По извршената автоматска обработка на отпечатоците, констатирано е дека потекнуваат од пријавениот. Тој е приведен во Полициската станица „Чаир“ каде е остварен разговор во кој го негира извршувањето на кривичното дело.
Против Р.Н. во периодот од 2011-2014 година поднесени се три кривични пријави од областа на имотните деликти (тешки кражби).