Директорката на Академијата за судии и јавни обвинители „Павел Шатев“, Анета Арнаудовска денеска во Белград, Република Србија ќе го презентира моделот на почетна обука во Академијата, во рамки на конференцијата „Пристап до правосудните професии“.
Целта на конференцијата, која е организирана од Мисијата на ОБСЕ во Србија и Правосудната академија на Република Србија, е размена на меѓународните и регионалните практични искуства во поглед на пристапот до професиите судија и јавен обвинители.
Покрај директорите на правосудните академии од регионот, претставниците од Франција и Германија и Мисијата на ОБСЕ во Србија, на конференцијата ќе присуствуваат и претставници од правосудството на Република Србија.
Учеството на директорката Арнаудовска на конференцијата е од посебно значење бидејќи овој собир претставува одлична можност за унапредување на меѓународната соработка, како и за презентација на Академијата и правосудниот систем на Република Македонија.