Словенечката премиерка Аленка Братушек предложи на неформален состанок на шефовите на земјите-членки од ЕУ да се одржи донаторска конференција за помош на Србија и БиХ во кои неодамна беа причинети огромни штети поради поплавите.
Братушек верува дека ваква конференција ќе биде организирана, а претседателот на Европската комисија, Жозе Мануел Баросо смета дека е најдобро да се почека додека се направат проценки за штетите од водената стихија.
– Комисијата интензивно работи во координација со земјите-членки за да им се помогне на државите од Балканот, истакна Баросо.
Тој потсети дека ЕУ веднаш по првите повици за помош од Србија и БиХ испратила експерти, чамци и хеликоптери за помош на загрозеното население.