Тркалезна маса посветена на членот 6 од Европската конвенција за човекови права од аспект на правната сигурност со цел воедначување на судската пракса се одржа денеска во просториите на Академијата за судии и јавни обвинители во Скопје.
Тркалезната маса, како што информираат од Академијата, се организира согласно Заклучокот од состанокот на Меѓуресорската комисија за извршување на одлуките на Европскиот суд за човекови права во Стразбур и на неа учествуваа претседателите на граѓанските и трговските оддели од Врховниот суд на Република Македонија, апелациските и основните судови.
Директорот на Бирото за застапување на Република Македонија пред Европскиот суд за човекови права, Костадин Богданов пред присутните ги презентира случаите пред Европскиот суд за човекови права со наводи за повреда на чл.6 од ЕКЧП во делот на воедначената судска пракса, додека за искуствата на Врховниот суд на Република Македонија од аспект на примената на чл. 6 од ЕКЧП излагање имаше судијата и претседател на Одделот за судење во разумен рок на Врховен суд на РМ, Николчо Николовски.