Во Струга денеска ќе почне првиот меѓународен Симпозиум за первазивни развојни нарушувања „Научни достигнувања во функција на практиката“.
Дводневниот симпозиум го организираат Сојузот на дефектолози и Универзитетската клиника за детски болести во соработка со Филозофскиот и Медицинскиот факултет при Универзитетот „Св. Кирил и Методиј“ од Скопје. Покровител на настанот е Министерството за здравство.
На симпозиумот ќе се разговара за клиничките стратегии и трендови во рехабилитацијата на первазивни развојни нарушувања, воспитанието и образованието, како и социоекономските аспекти на лицата со вакви нарушувања.
Целта е да се зајакне комуникацијата на едукаторите, истражувачите, медицинските лица и родителите, да се разменат искуства и сознанија и да се дадат предлози за унапредување на дијагностиката и рехабилитацијата и едукацијата на децата со первазивни развојни нарушувања.
Во рамки на симпозиумот ќе се одржат и две работилници на кои ќе се дебатира за третманот и поуспешното дејствување при состојби на непожелно однесување кај децата со Аутистичен спектар, како и формите за унапредување на учењето во процесот на совладување на нови знаења во тек на рехабилитацијата и едукацијата.