На интернет порталите со сатирична содржина се пишува за исчезнувањето на Роза Топузовска и премислувањето дали таа ќе одлучи да се откаже од пратеничкиот мандат. Топузовска е единствената во цела опозиција која нема потпишано дека се откажува од пратеничкиот мандат и покрај одлуката на највисоките тела на опозициските партии.
Текстот од Козаностра во целост го пренесуваме:
Средовечна жена која според описот одговара на кандидатката за пратеник од ЛДП Роза Топузовска видена деновиве како кружи околу парламентот. Според граѓаните кои ја забележале, лицето за кое се верува дека би можело да е Роза е забележано во паркот до Собранието на РМ со цвет во раката.
– Поминав веднаш до неа, речиси сум сигурен дека беше таа. Држеше во раката цвет и ги кинеше ливчињата едно по едно. Ја чув како си зборува “да влезам, да не влезам, да влезам, да не влезам…” – раскажува граѓанин.
Тој се јави во нашата редакција откако на интернет прочитал дека ЛДП и Андреј Жерновски изгубиле секаков контакт со Роза Топузовска. Таа не им кревала телефон за да им каже дали ќе го прифати ставот на опозицијата и на сите нејзини 119 колеги од листите да го отфрлат пратеничкиот мандат – пишува сајтот Козаностра.