САД изразуваат голема загриженост поради зголемувањето на тензиите во јужниот украински град Одеса, изјави портпаролот на Белата куќа, Џеј Карни.
– Потенцијалното излегување на Одеса од контролата на украинските власти ја потенцира неопходноста од итно деескалирање на кризата, нагласи Карни и ја повика Русија да ги исполни своите обврски од спогодбата постигната минатиот месец во Женева, за смирување на ситуацијата во Украина, а во спротивно се закани со нови санкции.
Четириесет и шест лица загинаа во петокот во Одеса, кога административна зграда беше запалена за време на судирите меѓу проруските сепаратисти и радикалните украински националисти.
Карни изрази увереност дека претседателските избори во Украина на 25 мај ќе му овозможат на народот самиот да си ја избере својата иднина.
Во меѓувреме рускиот заменик-министер за надворешни работи Григориј Карасин изјави дека Русија ги повикува двете страни во украинскиот конфликт, централната власт во Киев и регионите да седнат на преговарачка маса за да пронајдат решение за кризата.