Рано изутринава во строгиот центар на Париз, во близината на Операта, беше направен спектакуларен обид за грабеж на продавница за накит, јави дописникот на МИА од Париз.
Крадците при обидот за грабеж користеле бел камион натоварен со градежен материјал, обидувајќи се со него во 5 часот и 30 минути да влезат во златарницата „Бушерер“, прво преку влезната врата, а потоа и преку излогот. Но, металниот столб поставен зад вратата на продавницата го блокирал камионот. Излогот на продавницата е оштетен, но сепак не попуштил пред налетот на камионот.
Крадците откако не успеале да влезат во продавницата побегнале од местото на настанот. Париската полиција започна истрага за обид за грабеж.
Продавницата за накит во Париз, која е во сопственост на швајцарското семејство Бушерер, се протега на 2.200 метри кавдратни на три ката и нуди 23 големи марки на часовници како „Ролекс“, „Вашерон-Константи“ и „Лонгинес“, по цени од 200, па до 400.000 евра.
Продавницата и покрај обидот за кражба изутринава е отворен, бидејќи има и друг влез.