Во Македонската академија на науките и уметностите денеска ќе биде промовирана книгата „Ферментација на демократијата и нацијата – сите македонски политички пролети од 1943 до 1993“ од проф. д-р Димитар Мирчев на издавачката куќа „Силсонс“ од Скопје.
Во своето најново дело познатиот универзитетски професор и научник прави политолошка анализа на три клучни периоди на модерната македонска политичка историја: Асномската пролет 1943 – 1944, либералната пролет 1968 – 1973 и пролетта на независноста од 1989 до 1993 година.
Мирчев во делото дава критички поглед и синтеза на нашиот понов политички развој, раздобје кое ја определува и нашата сегашност, па и насоките на движење. Тој како граничници и двигатели ги поставува идеалите за независна и обединета Македонија, за граѓанско-демократска република, за автономија и суверенитет и за либерален поредок. На таа основа, според него, созревала демократската и националната свест.
За делото ќе говорат акад. Владо Камбовски, претседател на МАНУ, проф. Гордана Силјановска Давкова и проф. Владо Поповски.