Гласањето во шест избирачки места од Осмата изборна единица, во Северна Америка, почна без проблеми. За гласање на претседателските избори се пријавени над 1.400 гласачи, а на предвремените парламентарни избори ќе гласаат над 3.300 гласачи.
Во некои од избирачките места, каде има поголем број пријавени гласачи, се создаваат и редици за чекање.
– До 10 часот одѕивот за парламентарните избори изнесува 13 проценти, а за претседателските 11 проценти. Се тече во најдобар ред, излезноста е поголема во споредба со првиот круг гласање на претседателските избори пред две недели, и имаме и помала група граѓани кои чекаат во ред за да гласаат, велат од конзулатот во Торонто.
Редот за гласање засега е најголем во конзулатот во Чикаго, каде се пријавени 1.040 гласачи за парламентарните избори. Околу 1.000 гласачи се пријавени и во конзулатот во Њујорк.
Во дел од верските и културните организации на македонските граѓани во Осмата изборна единица се организира и превоз до избирачкото место за гласачите кои живеат подалеку од конзулатите.
Гласањето е отворено и во двете најмали гласачки места во Осмата изборна единица, во амбасадите во Вашингтон и Отава, каде се пријавени по 40-ина гласачи.