Лидерот на Алијансата за позитивна Македонија Љупчо Зиков на денешната прес-конференција искажа задоволство што Коалицијата за Позитивна Македонија водела позитивна кампања, во која не користеле говор на омраза, ниту пак го напаѓале политичкиот ривал.
– Одработивме една кампања во контекст на она што го кажавме на почетокот, а тоа е дека ќе биде позитивна и полна со енергија, со проекти за доброто на граѓаните. Дефинираме и каде лежи одговорноста за се што се случува во Македонија во целиот овој период од 23 години. Успеавме да ја раскажеме нашата приказна во 20 дена кампања и да допреме до многу луѓе, до многу совесни и позитивни граѓани. Направивме преку 700 настани, поминавме многу илјади километри и буквално влеговме во секој македонски град, па и село, се качивме на секој важен македонски камен. Од таму, ги пративме нашите пораки, дека Македонија крајно време е да се сврти кон развојот, а македонските граѓани да се обединат не против некого туку меѓусебе за убави цели и за развој на Македонија, рече Зиков.
Според него, за жал, останале сами во оваа кампања заради тоа што единствено нивната Коалиција, која е составена од Алијансата за позитивна Македонија и Партијата на обединети пензионери и граѓани на Македонија, зборувала за развој.
– Јас лично си сум горд на себе и своите соработници што во кампањата не спомнавме ниту еден политички опонент со име и презиме, не спомнавме ниту една личност и не ја поврзавме со ниту една афера. Ние не гледавме зад нас, ние гледавме во нашата блиска и далечна иднина. Денеска сме свесни и задоволни од нашата работа, рече Зиков и порача дека по изборите нема да ги затворат вратите на штабовите и ќе продолжат да ја раскажуваат „нивната приказна во пресрет на следните избори“.
