„Сообраќаен хаос, метеж, небезбедно минување, со месеци голтање прашина. Ова е мал дел од цената која граѓаните на град Скопје секојдневно ја плаќаат за сметка на желбата и потребата на градоначалникот Коце Трајановски „да биде виден како работи”, вака ВМРО-Народна партија ги коментира активностите на скопскиот градоначалник.
Наместо градежните работи да се одвиваат како и во секоја друга земја, дел по дел, фаза по фаза, во период кога најмалку има сообраќај и движење по улиците, кај нас, велат од ВМРО-НП, тоа се прави спектакуларно со купови расфрлан песок на сите страни, раскопани улици и тротоари од двете страни во недоглед и се разбира со што поголемо одолговлекување на градежните зафати.
„Сево ова на граѓаните на град Скопје им предизвикува дополнителен стрес, отежнување во секојдневното извршување на обврските и неможност за нормално функционирање, кое вам господине Трајановски и на најголемиот број на градоначалници на скопските општини изгледа не ви е ни малку важно, а тоа досега безброј пати го покажавте со лошо организирање и планирање на работите, небезбедно изведување и бавно завршување на градежните работи.
Покрај хаос во градењето на идните градоначалници очигледно ќе им оставите и хаос во општинските каси и буџети“, изјави Билјана Јовановска.
ВМРО-Народна партија го прашува зошто работа која досега требаше да биде одамна заршена, тенденцизно ја одолговлекува до почетокот на изборната кампања, во очаен обид , како што велат, да собере политички поени од граѓаните и да создаде слика дека „градоначалникот постојано нешто работи”!?
„На граѓаните на град Скопје им е повеќе од познато дека лопатите, сечењето на ленти и сликањето се само чин на лицемерие и популизам“, велат од ВМРО-НП.