ВМРО-ДПМНЕ остро го осудува насилството врз младата девојка Сара од Охрид и бара целосно расчистување на случајот, нагласувајќи дека никој не е над законот и дека сите институции мора да постапуваат согласно законите.
Од партијата велат дека застануваат зад Сара и нејзиното семејство, изразуваат сочувство и повикуваат на итна и решителна реакција во заштита на жртвите на насилство и владеењето на правото.
„За насилството нема и нема да има место во Македонија“, наведуваат од ВМРО-ДПМНЕ, повикувајќи ги надлежните институции да ги преземат сите мерки за целосно расчистување на случајот и изведување на сторителот пред лицето на правдата.
Од партијата упатуваат критики и до Обвинителството, наведувајќи дека откако МВР го обезбедило осомничениот, надлежниот јавен обвинител го пуштил на слобода со благи мерки на претпазливост.
Ваквото постапување го оценуваат како скандалозно и бараат одговорност, додавајќи дека доколку постојат индиции за обид за заташкување на случајот или незаконско влијание врз постапката, сите инволвирани мора да бидат повикани на одговорност.
Од ВМРО-ДПМНЕ порачуваат дека институциите не смеат да имаат милост кон насилниците и дека ниту еден случај на насилство врз жените не смее да помине неказнето.
