Арон Орбан, помладиот брат на екс унгарскиот премиер Виктор Орбан, е приведен под сомнение за трговија со луѓе. Ова денеска на Фејсбук го објави Петер Маѓар, повикувајќи се на медиумски извештаи.
„Според медиумските извештаи, братот на Виктор Орбан, Арон Орбан, е приведен под сомнение за трговија со луѓе. NVVH и Националното биро за истраги ја продолжуваат истрагата“, напиша Маѓар на социјалните мрежи.
Како што пренесува унгарскиот информативен портал „Портфолио“ (Portfolio), Националната канцеларија за повраток и заштита на имот (NVVH) и Националното биро за истраги (NNI) утрово спроведоа заедничка операција во Будимпешта и на неколку локации во округот Пешта, како дел од истрага за трговија со луѓе.
Според официјалното соопштение, уапсени се неколку лица во рамките на две паралелни кривични постапки, а извршени се и претреси во нивните домови.
Порталот наведува дека Арон Орбан можеби е меѓу уапсените, иако неговото приведување сè уште не е експлицитно потврдено во досега објавените официјални информации.
Надлежните органи најавија дека дополнителни детали за истрагата ќе бидат соопштени подоцна попладнево. Според претходни медиумски извештаи, еден од случаите што ги истражуваат властите се однесува на компанија во сопственост на Арон Орбан, која наводно запишувала виетнамски државјани на дводневен курс за спасување живот на Универзитетот во Печуј.
Постои сомневање дека оваа практика можеби го олеснила добивањето шенген-визи.
„Портфолио“ исто така пренесува дека, во еден случај, Арон Орбан наводно интервенирал за да го забрза процесирањето на барање за виза.
Истрагата е во тек, а властите сè уште немаат објавено целосни детали за идентитетот на уапсените лица, ниту пак за степенот на нивната можна одговорност.