Ирак постигна договор со Соединетите Американски Држави (САД) кој овозможува извоз на ирачка нафта преку Ормутскиот теснец, користејќи пловен пат во близина на Оман, изјави ирачкиот министер за надворешни работи, Фуад Хусеин. Во интервју за „Ал Џезира“, тој истакна дека загубите на Ирак, кои произлегоа од војната со Иран и прекините во извозот на нафта, достигнаа 60 милијарди долари.
Хусеин откри дека Министерството за финансии на САД официјално побарало затворање на граничните премини со Иран, при што би останале отворени само два премина – еден во регионот Курдистан и еден во останатиот дел од земјата.
Тој нагласи дека Багдад води постојан дијалог со Вашингтон за да се спречи штета врз ирачката економија, со оглед на тешкотиите при спроведувањето на овие барања и нивното директно влијание врз билатералната трговија, која на годишно ниво изнесува меѓу 15 и 18 милијарди долари.
Тој се осврна и на посетата на ирачкиот премиер Али ал-Зубаиди на Турција, наведувајќи дека средбата резултирала со јасни договори за управување со прашањата поврзани со водите, во замена за проток на енергенси. Договорот предвидува турски компании или турската влада да управуваат со проекти за води во Ирак со цел справување со сушата, во замена за континуиран извоз на нафта преку нафтоводот Ирак-Турција – при што количините постепено се зголемуваа од 20.000 на 30.000 барели, за на крајот да достигнат 260.000 барели дневно.
Во однос на прашањето за Сирија, Хусеин изјави дека односите меѓу Багдад и Дамаск станале одлични и се засноваат на заеднички интереси, независно од какво било надворешно влијание.