Украинскиот претседател Володимир Зеленски денеска изјави дека клучните теми на разговорите, одржани на 4 и 5 ноември во Брисел меѓу претставници на Украина, Европската Унија, НАТО и Соединетите Држави, биле безбедносните гаранции за Украина и подготовките за трилатерална средба во Абу Даби.
Украинскиот претседател истакна дека на средбата во Брисел учествувале претставници од сите страни вклучени во дискусиите за безбедносните гаранции – односно ЕУ, НАТО и САД – пренесува „Укринформ“.
„Важно е што сите претставници кои се занимаваат со безбедносните гаранции – ЕУ, НАТО и Американците – учествуваат на средбата во Брисел“, рече Зеленски.
Тој напомена дека веќе е постигнат одреден напредок во текот на разговорите, нагласувајќи ја потребата сè да биде јасно дефинирано во официјалните документи, вклучително и конкретниот одговор што би следел доколку Русија започне нови напади врз Украина.
„Од суштинско значење е да постои јасност за тоа што ќе се случи, кој какви дејствија ќе преземе, со какви средства и во кој момент. Овие одговори се, пред сè, важни за нас – Украинците – но исто така е важно и јавноста да биде информирана за нив“, изјави Зеленски.
Според него, разговорите во Брисел се одвиваат на неколку нивоа, со цел да се подготват одговори на прашањата што би можеле да се покренат за време на разговорите во Обединетите Арапски Емирати, закажани за 10 и 11 ноември.