Премиерот на Косово, Албин Курти, денеска изјави дека очекува новата влада во Србија да го промени својот пристап кон Косово.
На 64-тата седница на Генералниот одбор на неговата партија „Самоопределување“ тој зборуваше за резултатите од парламентарните избори во Србија, кои, според него, донесоа значителни промени на политичката сцена во соседната земја, како и за резултатите што ги постигнаа политичките претставници на Албанците во Прешевската долина.
Курти наведе дека албанската коалиција освоила 27.670 гласови, со што обезбедила два пратенички мандати и го постигнала најдобриот резултат за Албанците во Србија од 2020 година наваму.
„Минатата недела, во неделата, во Србија се одржаа парламентарни избори кои донесоа историски резултати за Албанците и значајни политички промени кај нашиот северен сосед. Албанската коалиција освои 27.670 гласови, дури 1.233 повеќе отколку во 2020 година, што претставува најдобар резултат за Албанците од 2020 година и обезбеди два пратенички мандати“, рече Курти.
Тој, исто така, се осврна на обединувањето на албанските политички субјекти, истакнувајќи дека постигнатиот резултат е доказ за ставање на општиот интерес пред партискиот интерес.
„Четврт век по поразот на Милошевиќ и Шешељ на почетокот на 21 век, нивните политички наследници, Вучиќ и Дачиќ, ја изгубија власта во Србија, но сè уште не знаеме кој победил. Се надеваме дека оваа политичка промена ќе биде проследена со позитивна промена во пристапот на официјален Белград кон Република Косово и кон Албанците во Прешево, Бујановац и Медвеѓа“, рече Курти.