Демократите во Комитетот за правосудство на Претставничкиот дом на американскиот Конгрес објавија извештај од 52 страници во кој го обвинуваат американскиот претседател Доналд Трамп дека директно учествувал во сексуалното злоставување девојки во друштво на Џефри Епстин. Во извештајот се обвинува и Министерството за правда на САД дека со години прикривало докази и криело клучни документи од јавноста и Конгресот.
Документот, насловен „Некои работи ни се заеднички, Џефри…“, ги анализира исказите на 11 жени, од кои пет директно го обвинуваат Трамп за тешки сексуални престапи во друштво на Епстин или во негово присуство.
Иако овие обвинувања не доведоа до кривична постапка против Трамп, демократите во Конгресот побараа именување независен специјален обвинител кој ќе ги истражи врските на Трамп со покојниот сексуален престапник, можните соучесници и улогата на правосудните институции во прикривањето на документите.
Меѓу најтешките тврдења во извештајот е исказот на Беатрис Кеул, поранешна швајцарска учесничка на избори за убавина, која тврди дека Трамп насилно ја силувал во ноември 1993 година во апартман во њујоршкиот хотел „Плаза“, за време на натпреварот „Американ дрим“.
Кеул наведува дека претходно истиот ден ѝ пристапил Епстин, кој се претставил како „најдобриот пријател на Дон“. Според нејзиното тврдење, по нападот Трамп ја оставил со модринки и крвава, нудејќи ѝ американска виза и упис на Универзитетот Њујорк, со порака дека „претставата мора да продолжи“.
Во извештајот се наведува дека Кеул претходно го опишувала настанот како обид за силување што успеала да го спречи, но не се објаснуваат причините за промената во нејзиниот исказ.
Во документот се наведува и дека интерни досиеја на ФБИ ги поврзуваат Трамп и Епстин во категоријата „искористување малолетници“ во рамките на истрага од 2007 година. Според тврдењата на свиркачите, дел од овие документи незаконски им биле ускратени на истражителите.
Демократите наведуваат и дека во 2025 година, тогашниот заменик-главен државен обвинител Тод Бланш во три наврати го пренасочувал разговорот за време на испрашувањето на Гислејн Максвел кога била спомената жртва под псевдонимот „Џејн“. Според наводите, Епстин ја одвел девојката на имотот Мар-а-Лаго на Трамп кога имала само 14 години.
Извештајот ја доведува во прашање и долгогодишната изјава на Трамп дека го избркал Епстин од својот клуб на Флорида затоа што бил „одвратен“.
Повикувајќи се на претходно цензуриран документ од 2009 година, во извештајот се наведува дека Трамп тогаш изјавил оти никогаш не побарал од Епстин да го напушти клубот. Истото, според документот, го потврдил и тогашниот управител на Мар-а-Лаго.
Во белешките од разговор на ФБИ со поранешна асистентка на Епстин се наведува и дека токму Епстин го запознал Доналд Трамп со неговата сегашна сопруга Меланија. Ова е спротивно на официјалната верзија дека ги запознал модниот агент Паоло Замполи, што и самата Меланија Трамп претходно јавно го изјавила.
Во документот се споменува и исказот на манекенка под псевдонимот Кејт, која навела дека Максвел ја запознала со Трамп на забава во Њујорк и договорила средба меѓу нив. Потоа, според нејзиниот исказ, заедно патувале со приватен авион до Флорида.
Сведокот не го обвинил Трамп за несоодветно однесување. Сепак, официјалните податоци покажуваат дека Трамп меѓу 1993 и 1996 година најмалку осум пати патувал со авионот на Епстин.
Белата куќа: Очајнички потези на растроени демократи
Белата куќа веднаш ги отфрли обвинувањата од извештајот, тврдејќи дека ниту едно од нив не е точно.
„Овој ‘извештај’ не е ништо друго освен очајнички обид на растроените демократи да го одвлечат вниманието на Американците од растечкиот замав на републиканците, поттикнат од историските достигнувања на претседателот Трамп. Претседателот го избрка Џефри Епстин од својот клуб на Флорида затоа што беше одвратен и целосно е ослободен од каква било вина поврзана со него“, изјави портпаролката на Белата куќа, Лорен Бис.
Извештајот беше објавен во период на предизборна кампања за Конгресот, во која демократите ги претворија врските со Епстин во една од главните политички теми, вложувајќи повеќе од 36 милиони долари во телевизиски и дигитални реклами.
Иако ревизијата на ФБИ и Министерството за правда потврди дека Епстин сексуално злоставувал повеќе од илјада жртви пред да изврши самоубиство во затвор во 2019 година, досегашните официјални истраги не најдоа докази за постоење компромитирачка „листа на клиенти“, ниту основа за покренување кривична постапка против Трамп.
Обвинувањата во извештајот се тврдења на неговите автори и на наведените сведоци и сами по себе не претставуваат судски утврдени факти.