Полицијата во Северна Ирска и Шкотска истражува заканувачки електронски пораки испратени до стотици училишта, за кои се верува дека се лажни.
Министерот за образование во Стормонт изјави дека училиштата во Северна Ирска добиле закани за поставени бомби, но тие не се третираат како реални.
Полициската служба на Северна Ирска (PSNI) соопшти дека дури 300 училишта пријавиле добивање на иста електронска порака со општа закана, која пристигнала од надвор од Велика Британија, пренесе „Скај њуз“ (Sky News).
„Се верува дека слични пораки добиле и одредени училишта низ Велика Британија“, додадоа тие за „Скај њуз“.
Шкотската полиција соопшти дека е запознаена со заканувачките пораки испратени до голем број училишта низ земјата и дека ги третира како лажни.
Според достапните информации, некои училишта во близина на Глазгов биле евакуирани во понеделникот наутро, но оттогаш повторно се отворени. Шкотската влада соопшти дека е информирана за овие лажни закани.
Зборувајќи за заканите во Северна Ирска, министерот за образование во Стормонт, Пол Гиван, изјави: „Ми се чини дека пораките доаѓаат од исламисти кои се закануваат дека ќе воведат шеријатски закон во нашата земја“, додавајќи дека пораките биле потпишани со „Алах акбар“.
Тој го осуди попречувањето на образованието на младите, откако голем број училишта беа затворени поради закани примени преку официјалните канали за комуникација.
Полициската служба на Северна Ирска соопшти дека спроведува „итна истрага“ и дека е во контакт со погодените училишта.