Во индустриската зона Тримлини во близина на Лендава, откриена е најголемата нелегална фабрика за цигари во Словенија.
Фабриката се наоѓа во хала недалеку од граничниот премин Петишовци, а истрагата е започната откако службениците на финансиската управа запреа камион на патот помеѓу Лендава и Петишовци, објави „Словенске новице“.
Според првите проценки, вредноста на запленетата стока е околу 30 милиони евра, што ја рангира таа заплена меѓу најголемите во Европската Унија во последно време.
Покрај нелегалното производство, во халата откриени се и сурови услови во кои биле држени работниците.
Според неофицијални информации, таму живееле и работеле најмалку 20 странски државјани, наводно од Парагвај, кои биле принудени да работат од криминална организација, наведува словенечкиот медиум.
Тие им кажале на истражителите дека биле заклучени во фабриката и дека „не ја виделе дневната светлина најмалку 25 дена“.
Спиеле во халата, а храна им била доставувана само навечер.
Полицијата потврди дека покрај нелегалното производство на цигари, истражува и сомневање за трговија со луѓе. Се верува дека криминалната група што ја водела фабриката е поврзана со меѓународни мрежи.