Естонскиот министер за надворешни работи Маргус Цахкна денеска изјави дека европските земји треба да престанат да ги нарекуваат руските напади „хибридни“, бидејќи, како што наведе, станува збор за терористички и саботажни напади кои се дел од систематско руско дејствување против Европа.
„Тоа се терористички напади, тоа се саботажни напади и тоа е дел од еден вид војна“, рече Цахкна во интервју за бриселскиот портал „Политико“.
Тој ги даде овие коментари откако Естонија соопшти дека руските специјални служби се одговорни за подметнувањето пожар во август во објектот на компанијата „Милрем роботикс“ (Milrem Robotics) во Талин, која произведува беспилотни копнени возила за Украина.