Пристапот на Белата куќа кон сојузниците што воведуваат санкции за израелските доселеници се сведува на едноставна стратегија: минимални коментари и никакво мешање во настаните што се одвиваат. Засега, американската администрација им препушта на Обединетото Кралство и на другите партнерски земји да ја преземат водечката улога, додека Вашингтон набљудува од страна, пренесува „Политико“.
Во средата, претседателот Доналд Трамп даде само краток коментар за прашањето, наведувајќи дека ја разгледува ситуацијата. Еден ден претходно, државниот секретар Марко Рубио изјави дека САД не планираат да воведат сопствени санкции, но и дека не ги осудуваат потезите на Обединетото Кралство и на другите земји. Рубио додаде дека САД ја делат целта на своите сојузници за постигнување стабилност на Западниот Брег и спречување на понатамошно насилство.
Овие воздржани изјави се дел од смислена стратегија, објаснува претставник на администрацијата запознаен со политиката кон Израел. „Нема потреба да се мешаме во секое несогласување меѓу сојузниците. Израел може и ќе се брани сам“, рече претставникот, кој побара анонимност поради чувствителноста на дипломатските напори. Тој потврди дека Вашингтон во овој случај останува настрана.
Сето ова ја истакнува моменталната чувствителност на позицијата на администрацијата на Трамп во однос на Израел. Белата куќа е подготвена да преземе одредени чекори за да изврши притисок врз премиерот Бенјамин Нетанјаху да се усогласи со мировните иницијативи на Трамп. Во исто време, администрацијата внимава да избегне каков било потег што би можел да се протолкува како нарушување на односите со Израел. Станува збор за долгогодишен партнер со кој САД водат кампања против Иран и кој продолжува да ужива силна поддршка во Републиканската партија. Изјавите на Рубио, кои укажуваат на незадоволството на администрацијата од актуелната израелска влада, покажуваат дека Белата куќа се обидува да најде рамнотежа. Ова го тврди Курт Милс, извршен директор на списанието „Американ конзерватив“ (American Conservative), кој редовно комуницира со претставници на администрацијата.
„Тоа решава повеќе проблеми одеднаш“, вели Милс. „Ако односите со Британците се релативно добри, а ова е начин малку да се ограничи Нетанјаху, мислам дека тие се подготвени за тоа“, објасни тој, користејќи го прекарот на Нетанјаху.
Белата куќа и Стејт департментот не одговорија веднаш на барањата за коментар.
Вашингтон ја следи ситуацијата од страна додека Обединетото Кралство, Франција и Канада воведуваат санкции против израелските населби. Тие најавија прекин на трговијата со територии што според меѓународното право се сметаат за незаконски окупирани. Британските официјални лица нагласија дека однапред ги информирале САД за своите планови и потврдија дека не наишле на значителен отпор.
Прашан за реакцијата на САД, британскиот министер за надворешни работи Ед Милибанд во средата изјави за „Скај њуз“: „Ќе им препуштам ним да кажат што мислат. Но, сметам дека постои вистинска загриженост за она што се случува на Западниот Брег“.
Израелските доселеници во последните недели ги зачестија насилните напади врз локалните Палестинци, што предизвика ретки осуди и од американските официјални лица и од израелската влада.
Владата на Нетанјаху ја поддржува експанзијата на овие населби, вклучително и на таканаречената област Е1, од чија изградба Израел претходно се воздржуваше поради меѓународниот притисок. Израелските населби во зоната Е1 практично би ја пресекле палестинската територија на два дела, со што би се оневозможило решението со две држави.
Во вторникот, Милибанд претстави план за санкции и изјави дека британската влада „се согласува оти во делови од Западниот Брег се случува етничко чистење на Палестинците“. Тој најави дека Обединетото Кралство планира да воведе мерки против компании и поединци чии услуги ја поддржуваат експанзијата на населбите. Сепак, малку е веројатно дека планот веднаш ќе стапи на сила, бидејќи за неговата имплементација ќе бидат потребни од шест до девет месеци.
Трамп, кој е познат по честите објави на социјалните мрежи, сè уште нема напишано ниту една реченица во одбрана на Израел. Тој се осврна на темата дури во средата, одговарајќи на прашања од новинарите. Избегна да навлегува во детали, велејќи само дека „тукушто ја видел“ одлуката и дека планира да разговара со Израел за да ја разбере „нивната позиција“. „Точно разбирам што се случува, но сакам да дознаам зошто ова се случи одеднаш“, додаде Трамп.
Нејасноста на Трамп, како и реакцијата на администрацијата во целина, покажуваат колку Белата куќа сака да избегне нови конфликти пред неколку важни настани, вели Викторија Коутс, поранешен висок функционер за национална безбедност задолжен за Блискиот Исток за време на првиот мандат на Трамп.