Американскиот претседател Доналд Трамп објави дека САД постигнале договор со Венецуела со кој треба да добијат мнозинска контрола врз повеќе од 65 милијарди барели докажани нафтени резерви на земјата. Трамп го нарече договорот „најголемиот нафтен договор во историјата на светот“.
Трамп на „Truth Social“ напиша дека договорот, според неговите инструкции, го преговарале американскиот државен секретар Марко Рубио, секретарот за одбрана Пит Хегсет и привремената претседателка на Венецуела Делси Родригез, со учество на приватниот сектор.
„Обезбедија мнозинска американска контрола врз повеќе од 65 милијарди барели докажани нафтени резерви во Венецуела, и тоа без никаков трошок за американските даночни обврзници“, напиша Трамп.
Венецуела ги има најголемите докажани нафтени резерви во светот, со повеќе од 300 милијарди барели. Според објавените информации, новиот договор опфаќа 17 нафтени полиња со проценети 65 милијарди барели, односно приближно една петтина од вкупните резерви на земјата.
Според американски претставник запознаен со договорот, САД и приватен партнер, чие име сè уште не е објавено, треба да основаат нова компанија која ќе добие права за развој на овие нафтени полиња во период од 100 години.
Венецуелската влада проценува дека договорот би можел да привлече околу 100 милијарди долари инвестиции во нафтената индустрија на земјата.
Трамп тврди дека договорот ќе ги „повеќе од двојно зголеми американските нафтени резерви“, ќе го зголеми снабдувањето и на долг рок ќе ги намали цените на горивата во САД.
Договорот доаѓа речиси девет месеци откако американските сили го соборија и го заробија Николас Мадуро, по што Делси Родригез ја презеде власта.
Вашингтон оттогаш настојува да ги зголеми испораките на венецуелска нафта кон американските рафинерии и да привлече американски компании во запоставениот енергетски сектор на земјата.
Венецуела моментално произведува околу 1,25 милиони барели сурова нафта дневно, што е значително помалку во споредба со производството пред неколку децении. Годините на недоволни инвестиции, санкции и лошо управување сериозно ја оштетија нафтената инфраструктура.
Родригез го поздрави договорот и порача дека тој ќе има значително влијание врз економското закрепнување на земјата.
Администрацијата на Трамп сака да го зголеми снабдувањето со нафта во пресрет на конгресните избори подоцна оваа година, додека растот на цените на бензинот создава политички притисок врз Белата куќа.
САД истовремено бараат начини за обновување на Стратешките нафтени резерви, а дополнителното производство во Венецуела би можело да помогне и во стабилизирањето на снабдувањето на американските рафинерии.
Сепак, сè уште не се објавени детали за тоа кои приватни компании ќе учествуваат во договорот, како точно ќе изгледа американската „мнозинска контрола“ и кога дополнителните количества венецуелска нафта би можеле да стигнат на светскиот пазар.