Тројца македонски државјани загинаа денеска во Словенија, во тешка сообраќајна несреќа што се случи околу 16:30 часот на приморски автопат.
Автомобил со пет лица удри во приколка на товарно возило.
Првичните информации на Полициската управа Копер се дека товарното возило поради дефект е запрено, а автомобилот удри во задниот лев дел од приколката.
Во автомобилот патуваа пет лица, сите македонски државјани, а лекар на местото на несреќата ја потврди смртта кај три лица, додека едно повредено лице е пренесено во болница со хеликоптер.
Повреден е и возачот на автомобилот, кој со возило на итната медицинска помош е пренесен на болничко лекување.
Словенечките власти засега не објавија податоци за идентитетот, возраста и здравствената состојба на преживеаните.
На местото интервенираа повеќе полициски патроли, пожарникари и медицински екипи.