Такер Карлсон рече дека Русија е неговата омилена земја од сите земји што ги посетил и дека се надева дека повторно ќе ја посети, а во исто време ја критикуваше западната политика кон Москва и Украина.
„Мислам дека Русија е прекрасна земја. Неверојатна земја. Моја омилена од сите земји во кои сум бил. Бев таму неколку пати. Се надевам дека повторно ќе дојдам“, рече Карлсон во интервју за RT.
Тој претходно изјави дека планирал повторно да ја посети Русија во текот на зимата, но дека наишол на одредени тешкотии, без да прецизира какви биле тие. Тој истакна дека Русија му издала виза.
Во посебно интервју со новинарот Рик Санчез, Карлсон оцени дека Западот ја користи Украина како инструмент за да ѝ наштети на Русија.
Според него, Украина „не е независна држава, туку клиент на НАТО“ и се користи за постигнување на целта што ја опиша како „уништување на Русија“.
Тој оцени дека администрацијата на поранешниот американски претседател Џозеф Бајден и претходните американски администрации ја охрабриле Украина да се приближи кон НАТО, што, според него, придонело за избувнувањето на конфликтот.
Карлсон, исто така, изјави дека верува оти мнозинството Украинци сакаат крај на конфликтот преку преговори, додека ги обвини западните лидери за продолжување на војната, пренесува „Спутник“.
Во интервју за РТ, американскиот новинар зборуваше и за економската состојба во САД, оценувајќи дека земјата е „во подлабока смисла банкротирана“, бидејќи, како што тврди, должи повеќе отколку што поседува.