Цените на нафтата продолжија да паѓаат денес, достигнувајќи го најниското ниво за една недела, бидејќи инвеститорите реагираа позитивно на сигналите дека конфликтот на Блискиот Исток може да се смири.
Во исто време, глобалните залихи на сурова нафта се подобрија, објави „Трејдинг економикс“.
Цената на суровата нафта од Северното Море, Брент, падна на околу 88 долари за барел, додека американската лесна сурова нафта WTI ослабе на околу 82 долари за барел.
Оптимизмот на пазарот беше поттикнат од изјавата на американскиот претседател Доналд Трамп дека Вашингтон води „добри разговори“ со Иран и дека постои можност за постигнување договор.
Сепак, тој предупреди дека американските воени напади би можеле да продолжат доколку разговорите не бидат успешни.
Соединетите Американски Држави во петокот ги откажаа воените напади врз Иран по речиси две недели конфликт, додека Техеран соопшти дека ја прекинал својата воена одмазда и започнал разговори со Оман за безбедноста на пловидбата низ Ормутскиот теснец, еден од најважните светски патни правци за превоз на нафта.
Дополнителен фактор за падот на цената дојде од страната на понудата, откако повторно беше започнато со товарење на сурова нафта на терминалот на Конзорциумот за касписки цевководи (CPC) на брегот на Црното Море на Русија.
Ова е клучен извозен пат за казахстанската нафта, кој беше прекинат во последните денови поради напади од украински беспилотни летала.
Во меѓувреме, јеменските бунтовници Хути изјавија дека ги нападнале објектите поврзани со Сауди Арамко во градовите Џизан и Јанбу, но ниту саудиските власти ниту Арамко ги потврдија тврдењата.