Милиони луѓе се придружија на погребната поворка во Техеран денес за да го придружат телото на покојниот врховен водач ајатолах Али Хамнеи до светиот град Ком, објавија денес иранските медиуми.
Ожалостените излегоа на улиците на иранската престолнина и се придружија на погребната поворка, за која иранските власти рекоа дека е најголемото јавно собирање во модерната историја на земјата, објави иранската државна телевизија Прес ТВ. Поворката тргна во шест часот наутро по локално време од Големата џамија во Техеран, џамија на отворено каде што телото на ајатолахот беше изложено два дена.
Организаторите очекуваат поворката да трае 10 до 12 часа, по рута од 10 километри низ улицата Дамаванд, покрај плоштадот Имам Хусеин до плоштадот Азади и автопатот Шахид Лашгари, кој се наоѓа во близина на аеродромот Мехрабад.
Делегации од бројни земји, вклучувајќи шефови на држави, премиери и високи функционери од Русија, Кина, Индија, Пакистан, Ирак, Таџикистан, Турција и десетици други земји, пристигнаа во Техеран за да му оддадат почит на убиениот ајатолах во петок, додека јавноста можеше да се збогува со врховниот лидер во сабота и недела.
Организаторите изјавија дека се преземени сите потребни здравствени, медицински и социјални мерки, бидејќи се очекуваше голема толпа, како и во претходните денови.
Според соопштението од Штабот за одбележување на крвавото вознесение на великиот ајатолах Хамнеи, церемониите за збогување траеја неколку дена на отворениот простор на џамијата Имам Хомеини, а телото на Али Хамнеи ќе биде погребано во четврток, 9 јули, во светилиштето Имам Реза во Машхад, по неколкудневните церемонии во Техеран, Ком, Наџаф и Кaрбала.
Како што е објавено, телото на починатиот лидер ќе биде префрлено во светиот град Ком на 7 јули, по денешната погребна поворка во Техеран, а специјални церемонии за збогување и погреб се закажани за 8 јули во ирачките градови Наџаф и Кaрбала.
Конечно, завршните церемонии ќе се одржат во светиот град Машхад на 9 јули во светилиштето Имам Реза, објави иранската државна новинска агенција ИРНА, а Прес ТВ објави дека ова била желба на починатиот ајатолах.