Прославите на Денот на независноста на Соединетите Американски Држави беа обележани со насилство оваа година, со пукања и експлозии во кои загинаа најмалку пет лица, а десетици беа повредени во неколку градови, соопштија официјални лица.
Полицијата во Њујорк соопшти дека маж кој носел црна скијачка маска отворил оган врз семејства собрани на скара на Кони Ајленд во Бруклин доцна во саботата, ранувајќи најмалку осум лица, вклучувајќи четири деца, објави NBC. Вооружениот напаѓач избегал пеш, а властите изјавија дека работат на негово идентификување и апсење.
Во Флорида, 19-годишник беше убиен, а шест други беа ранети во пукање во центарот на Пенсакола кратко по 1 часот по локално време.
Шефот на полицијата во Пенсакола, Ерик Винстром, на прес-конференција изјави дека „најмладата жртва во овој случај имала 16 години“ и дека повредените се на возраст од 16 до 26 години.
Пукање избувнало и нешто по 3 часот наутро денес во Форт Вејн, Индијана, каде што една жена беше убиена, а осум возрасни лица беа згрижени за рани од огнено оружје кои не беа опасни по живот, соопшти полициската управа на Форт Вејн.
Во Комптон, Калифорнија, една жена и еден маж беа убиени, а тројца други беа повредени на голема забава, соопшти Канцеларијата на шерифот на округот Лос Анџелес.
Во Дејтон, Охајо, четири лица беа повредени во пукотница што се случи ноќеска во округот Орегон, населба позната по својот ноќен живот.
Во Кантон, Охајо, 46-годишна жена беше застрелана во грб додека спиеше во кревет откако осомничените и другите наводно пукале во воздух и поставиле огномет за да го прослават празникот Четврти јули.
Осомничениот, Дариус Џ. Лејшман, 24, беше уапсен и обвинет за кривично дело напад и незаконско исфрлање огнено оружје во станбена зграда.
Во Сент Луис, Мисури, 17-годишен тинејџер беше убиен во пукотница околу полноќ во саботата, а уште две 16-годишни момчиња беа однесени во болница со прострелни рани, соопшти полицијата, пренесува Танјуг. Во Чино, Калифорнија, експлозија на огномет уби едно лице, а тешко повреди уште две.