Во Италија, лошиот избор на обувки на планинарските патеки може скапо да ве чини, а казните достигнуваат и до 2.500 евра.
Во некои популарни туристички дестинации се воведени строги правила за обувки, а санкциите за несоодветна опрема можат да бидат исклучително високи. Ова особено важи за познатиот крајбрежен регион Чинкве Тере.
Спектакуларните планинарски патеки што ги поврзуваат живописните места привлекуваат илјадници туристи секоја година. Сепак, многумина ја потценуваат тежината на теренот.
Стрмните искачувања, тесните премини и карпите ги прават овие рути предизвикувачки дури и за искусните планинари, поради што локалните власти редовно проверуваат дали посетителите носат соодветна обувка.
Влечки, сандалите и сите обувки со рамни или лизгави ѓонови што не се наменети за планинарење се цел на инспекција.
Туристите кои ќе бидат фатени во таква обувка може да бидат казнети, а износите се движат од неколку десетици до дури 2.500 евра, во зависност од ситуацијата и проценката на надлежните служби.
Целта на овие мерки, како што истакнуваат локалните власти, не е да се казнат туристите, туку да се намали бројот на несреќи и интервенции од страна на спасувачките служби.
Локалните служби предупредуваат дека голем број несреќи се евидентираат секоја година поради несоодветна обувка.
Лизгањата, падовите и повредите на патеките честопати бараат интервенција на спасувачи, особено во текот на летната сезона кога патеките се најпрометни.
Ова претставува дополнителен товар за службите за итни случаи, кои веќе се справуваат со голем број туристи.
За планинарски и потешки планинарски патеки, се препорачува стабилна обувка со добар зафат – планинарски чевли или спортски чевли со квалитетен ѓон.
Клучот е стабилноста и сигурното стоење на нерамен терен.
Ако планирате планинарење во Италија, добра идеја е однапред да ги проверите локалните правила.
Она што на фотографиите изгледа како опуштена прошетка покрај морето, во реалноста може да биде сериозна планинарска рута.
А ако одите во апостолки, наместо разгледница од Италија, би можеле да понесете дома прилично непријатна казна.