Американските воени претставници развиваат нови планови за можни напади врз ирански капацитети во областа на Ормутскиот теснец доколку прекинот на огнот со Иран не успее, соопштија повеќе извори.
Според извештаите, се разгледуваат опции за „динамично таргетирање“ на иранските средства во и околу Ормутскиот теснец, јужниот Арапски Залив и Оманскиот Залив, вклучувајќи мали моторни чамци, бродови за поставување мини и други средства што се сметаат за асиметрични капацитети на Иран, објави CNN.
Изворите велат дека ваквите напади би биле насочени кон спречување на евентуално затворање на клучните водни патишта, што би имало значителни последици за глобалната економија и трговијата со енергија.
Во текстот, исто така, се наведува дека дел од крајбрежните ракетни капацитети на Иран се уште се оперативни и дека Иран има голем број мали бродови што можат да се користат во напади врз бродови.
Според истите извори, американските воени планери, исто така, разгледуваат пошироки опции, вклучувајќи напади врз инфраструктура со двојна намена и енергетски објекти, како и евентуално таргетирање на поединечни воени лидери и структури за кои се вели дека ги попречуваат преговорите.
Изворите исто така рекоа дека американската војска има значително присуство на Блискиот Исток, вклучувајќи носачи на авиони и други поморски сили, додека некои од операциите вклучуваат и пресретнување и качување на бродови поврзани со Иран.
Официјални лица од Пентагон велат дека војската е подготвена да му понуди на американскиот претседател различни опции, а во исто време нагласуваат дека администрацијата претпочита дипломатско решение, но дека можноста за продолжување на воените операции останува отворена.