Американскиот претседател Доналд Трамп објави серија драматични пораки на својата платформа Truth Social, тврдејќи дека Иран се соочува со финансиски колапс поради американската поморска блокада. Според Трамп, Техеран очајно сака да го отвори Ормутскиот теснец бидејќи губи 500 милиони долари дневно поради блокадата.
– Иран се урива финансиски! Тие сакаат Ормутскиот теснец веднаш да се отвори – гладуваат за пари! Губат 500 милиони долари дневно. Војската и полицијата се жалат дека не им се плаќа, напиша Трамп.
Во друга објава, Трамп тврди дека иранското раководство всушност не сака теснецот да е затворен, и покрај нивните закани, туку сака да биде отворен токму поради огромните приходи.
„Тие велат дека сакаат да биде затворен само затоа што јас целосно го БЛОКИРАВ, па затоа само сакаат да „го спасат образот““, рече американскиот претседател.
Трамп, исто така, откри дека пред четири дена, медијатори му пристапиле тврдејќи дека Иран сака веднаш да го отвори теснецот.
„Но, ако го сториме тоа, никогаш не може да има договор со Иран освен ако не го дигнеме во воздух остатокот од нивната земја, вклучувајќи ги и нивните лидери!“, додаде Трамп.
Овие остри пораки доаѓаат само неколку часа откако Трамп објави продолжување на примирјето со Иран за да му даде на Техеран повеќе време за преговори. Сепак, тој нагласи дека блокадата на иранските пристаништа ќе продолжи сè додека Иран не презентира „уникатен предлог за прекин на конфликтот“.
Трамп изјави дека донел одлука за одложување на нападот на барање на Пакистан, кој дејствува како посредник. „Им наредив на нашата војска да продолжи со блокадата и да остане подготвена сè додека не се поднесе нивниот предлог и не се завршат дискусиите, на еден или друг начин“, објасни Трамп за својата стратегија за „максимален притисок“.
Од друга страна, висок ирански функционер изјави за Ројтерс дека Техеран е подготвен за разговори во Пакистан, но само под услов Вашингтон да се откаже од својата политика на закани. Тој истакна дека Иран решително ги отфрла сите преговори насочени кон нивно предавање.
Иранската страна инсистира Пакистан, како посредник, да ги убеди САД да ја укинат поморската блокада и да го ослободат контејнерскиот брод Туска. Бродот под иранско знаме беше запленет од американската војска во неделата, што Техеран го смета за јасна пречка за какво било мирно решавање на конфликтот.