Иран нема да учествува во втората рунда разговори со САД бидејќи Вашингтон „континуирано ги кршеше своите обврски и се однесуваше неразумно“ за време на претходните разговори и за време на двонеделното примирје, соопшти денес канцеларијата на иранскиот претседател Масуд Пезешкијан.
Во соопштението, издадено по телефонскиот разговор на Пезешкијан со пакистанскиот премиер Шехбаз Шариф, се вели дека САД „јасно го прекршиле“ договорот за примирје со „провокативни и нелегални дејствија“, објави Ал Џезира.
„Ваквите дејствија, заедно со заканувачката реторика на американските претставници против Иран, само водат до зголемена недоверба во сериозноста на САД и откриваат повеќе од кога било дека САД сакаат да ги повторат претходните шеми и да ја предадат дипломатијата“, се вели во соопштението. Во соопштението се споменува и изјавата на Пезешкијан дека Иран ќе се брани од „секаков нов авантуризам од страна на САД и ционистичкиот режим“.
Шариф претходно изјави дека, откако иранските медиуми објавија дека Иран нема да учествува во втората рунда разговори со САД, тој и Пезешкијан „топло и срдечно“ разговарале за ситуацијата на Блискиот Исток. Иранските медиуми објавија дека Иран нема да учествува во новата рунда разговори поради „претераните барања на Вашингтон, нереалните очекувања, постојано менувачките позиции“, како и „тековната поморска блокада“, што Техеран ја смета за кршење на прекинот на огнот.
Не беше постигнат договор за време на разговорите на високо ниво меѓу САД и Иран во пакистанската престолнина минатиот викенд.