Шeснаесетгодишното владеење на унгарскиот премиер Виктор Орбан заврши по вчерашниот убедлив пораз на изборите што ќе предизвика политички превирања од Вашингтон до Москва. Најавтократскиот лидер на Европската Унија и близок сојузник на Доналд Трамп и Владимир Путин ќе му ја предаде власта на својот противник Петер Маѓар, пишува бриселски Политико.
Орбан го призна поразот кратко откако Маѓар објави синоќа на Фејсбук во 21:12 часот: „Премиерот Виктор Орбан штотуку ни се јави да ни честита за нашата победа“.
Маѓар обезбеди двотретинско мнозинство што ќе му овозможи да ги демонтира клучните карактеристики на „нелибералната демократија“ на Орбан. Ова подразбира укинување на цврстата контрола на премиерот врз судството, државните компании и медиумите.
Заминувањето на Орбан ќе биде големо олеснување за Европската Унија, чии системски слабости тој ги разоткриваше и искористуваше со години, а неодамна му помогна на Путин со блокирање на 90 милијарди евра европска помош за Украина. Функционерите во Брисел долго време го обвинуваа Орбан за поткопување на темелите на унгарската демократија и помагање на Путин да ја блокира клучната помош за Киев, но Унијата во голема мера не успеа да го ограничи неговото влијание, пишува Политико.
Тешкиот пораз на унгарскиот премиер ќе нанесе и болен удар на движењето MAGA на Трамп, кое го сметаше унгарскиот премиер за модел за свој тип на антиимигрантски, христијански ориентиран национализам.
Дури и неколку лични пораки за поддршка од Трамп, поткрепени со посети на државниот секретар Марко Рубио и потпретседателот Џ.Д. Венс, не успеаја да го свртат текот на трката.
Изборите беа обликувани од растечкото јавно незадоволство поради нестабилната економија на Унгарија и корупцијата и непотизмот поврзани со Орбан, се вели во пишувањето на Политико.