Полициски службеници од Регионалниот центар за гранични работи Југ го уапсиле 43-годишниот И.Д. од Гевгелија, под сомнение дека сторил кривично дело „криумчарење мигранти“.
Како што информира МВР, на 11 април 2026 година околу 21:20 часот, на регионалниот пат Богданци – Гевгелија, на локалитетот „Шарен мост“, патничко возило „Фолксваген“ со бугарски регистарски ознаки, управувано од И.Д., излетало надвор од коловозот.
По несреќата, возачот го напуштил местото на настанот, но по преземени мерки од страна на полицијата бил пронајден и приведен.
На местото на несреќата биле затекнати шест повредени мигранти од Египет. Едно лице се здобило со тешки телесни повреди и е пренесено во Комплексот клиники „Мајка Тереза“ во Скопје, додека останатите пет лица, како и возачот, се здобиле со полесни повреди.
За настанот е известен јавен обвинител од Основното јавно обвинителство Гевгелија, а увид на местото извршила екипа на ОВР Гевгелија.