Подготвеноста на американскиот претседател Доналд Трамп да разговара за предлогот од 10 точки за прекин на војната со Техеран претставува „победа“ за Иран, изјави денеска поранешниот руски претседател Дмитриј Медведев. Коментирајќи го привременото примирје објавено од Трамп еден ден претходно, Медведев, сегашниот заменик-шеф на Рускиот совет за безбедност, рече дека „здравиот разум“ преовладал, и покрај американските закани за „уништување на иранската цивилизација“ што сериозно го поткопуваат договорот, пишува Анадолу.
Во објава на Телеграм, Медведев изјави дека клучното прашање сега е дали Вашингтон ќе се согласи со планот.
„Во исто време, самиот договор на Трамп да разговара за планот од десет точки е победа за Иранците“, напиша тој.
Тој изрази сомнеж дека САД ќе го прифатат договорот, што може да доведе до нови непријателства, но исто така сугерираше постоење на „средна опција“.
„Трамп не сака и не може да води војна долго време, а Конгресот нема да го поддржи. Затоа, мора да се одржи кревко примирје и сите мора да се преправаат дека сè е во ред“ продолжи Медведев.
Тој, исто така, тврдеше дека Израел би можел да преземе свој потег во контекст на објавеното примирје, велејќи дека на Израел не му е потребно примирје и дека не ги решил сопствените проблеми, што ја прави ситуацијата „крајно неизвесна“.