Руски танкер, оштетен во серија експлозии и напуштен пред неколку недели, плови неконтролирано во Средоземното Море и влегол во либиската зона за пребарување и спасување, објави во петокот италијанската Цивилна заштита. Бидејќи бродот сега се наоѓа во либиски води, секоја интервенција е одговорност на либиските власти, на кои Италија им понуди помош, пишува Euronews.
Станува збор за танкер за транспорт на течен природен гас Арктик Метагаз, кој припаѓа на руската „флота во сенка“ под санкции, и кој транспортира нафта кршејќи ги меѓународните ограничувања воведени поради војната во Украина.
Le méthanier russe Artic Metagaz pourrait créer une catastrophe climatique en Méditerranée pic.twitter.com/O7OwHJgL1h
— BFM (@BFMTV) March 19, 2026
Бродот долг 277 метри беше оштетен во близина на Малта на почетокот на месецот, во напад за кој Русија тврди дека е извршен од украински морнарички беспилотни летала, додека Киев не ги коментираше тврдењата. По експлозиите на 3 март, триесет членови на екипажот го напуштија бродот, кој оттогаш плови без надзор. Сите членови на екипажот преживеаја.
Италијанската агенција, која внимателно ги следи движењата на бродот, вели дека најголемиот ризик во моментов е можно истекување на гас, иако досега не се откриени протекувања. Друга опасност е можноста танкерот да удри во една од офшор нафтените платформи, но овој ризик е помал бидејќи во моментов нема такви објекти во близина.
„Со оглед на преовладувачките јужни ветрови и морски струи, и под претпоставка дека тие нема да се променат, може да потрае околу четири, пет или шест дена за бродот да стигне до либиското копно“, изјави портпаролот на Цивилната заштита, Пјерфранческо Демилито, на прес-конференција во Рим.
Демилито додаде дека се проценува дека бродот носи 450 тони тешка нафта и 250 тони дизел гориво, покрај „неопределена“ количина течен природен гас што можеби делумно испарила.
Лидерите на Италија, Шпанија, Малта, Грција и Кипар испратија заедничко писмо до Европската комисија во среда, барајќи активирање на механизмот за цивилна заштита на ЕУ поради „непосреден и сериозен ризик“ од голема еколошка катастрофа.
Во писмото, исто така, се предупредува на пошироките опасности што ги претставуваат бродовите што пловат надвор од меѓународните стандарди, истакнувајќи ги заканите за поморската безбедност и животната средина низ Медитеранот.