Американскиот државен секретар Марко Рубио и неговите колеги од групата Г7 денеска ќе разговараат за Украина и начините на кои можат да ѝ помогнат во одбраната од Русија. Во исто време, во Обединетите Арапски Емирати почнуваат преговорите меѓу Русија, Украина и САД, додека министрите за надворешни работи на седумте најразвиени демократии ќе се сретнат во Франција со украинскиот министер за надворешни работи.
Украинскиот министер Андриј Сибиха денот ќе го започне со средба со Рубио во Париз, по што во француското Министерство за надворешни работи ќе учествува на состанок со сите министри од групата Г7, објави АП.
Главна тема ќе биде воената и безбедносната помош за Украина, која администрацијата на американскиот претседател Доналд Трамп ја намали. Оваа одлука предизвика загриженост во Киев, но и во европските престолнини, особено во Париз, Берлин, Рим и Лондон, чии држави се членки на Г7. Засега не е познато дали САД или некоја од другите членки ќе најави нова помош за Украина.
Во меѓувреме, во Абу Даби пратениците на Трамп, Стив Виткоф и Џаред Кушнер, ќе се сретнат со руски и украински претставници. Една од целите на разговорите е да се убеди Москва да прифати пошироки преговори за завршување на речиси петгодишната војна, во кои би учествувале и клучни европски претставници.
Европските држави бараат да бидат вклучени во преговорите во Абу Даби. Сепак, двајца американски функционери вчера изјавија дека претставници на Велика Британија, Германија, Франција, НАТО и Европската Унија нема да учествуваат во главните разговори.
Наместо тоа, пред почетокот на преговорите ќе разговараат за можните безбедносни гаранции и долгорочното уредување на безбедносните односи меѓу Русија и Европа.
Русија се противи на учеството на европските претставници и инсистира преговорите да останат исклучиво трилатерални, односно меѓу Русија, Украина и САД. Последните такви преговори се одржаа во февруари.
Германскиот министер за надворешни работи Јохан Вадефул, кој вчера во Париз одделно се сретна со Рубио на маргините на состанокот на Г7, порача дека Европа мора да учествува во разговорите.
„Сè уште сум многу благодарен на Соединетите Американски Држави за сите напори што ги вложуваат за да ги доведат завојуваните страни на преговарачка маса“, рече Вадефул.
„Но, повторно јасно порачав дека и Европа мора да биде на таа маса. Без Европа нема решение, само со Европа“, додаде тој.
Рубио изјави дека САД не се противат европските држави во одредена фаза да се вклучат во директните преговори, но сметаат дека сè уште не е време за тоа.
„На крајот, тоа би било позитивно, но пред нас има уште долг пат“, им рече тој на новинарите по целодневните заеднички и билатерални средби со колегите од Г7.
„Но, добро е што разговараат, добро е што трилатералните преговори повторно се започнати. Тоа е подобро отколку воопшто да нема преговори“, додаде Рубио.
Во пресрет на новата рунда преговори, Русија вчера повторно изврши силни напади врз украинската електроенергетска мрежа. Истовремено, украинските сили погодија уште една од најголемите руски нафтени рафинерии.
Борбите продолжуваат, а засега нема знаци дека која било од страните е подготвена да се откаже од своите барања.