Израел синоќа го нападна Али Лариџани, шефот на Врховниот совет за национална безбедност на Иран. Израелскиот министер за одбрана Израел Кац тврди дека Лариџани е убиен.
Во исто време, најмалку две ирански новински агенции, Тасним и Мехр, објавуваат дека Лариџани наскоро ќе објави порака. Во меѓувреме, израелски воен претставник потврди за Би-Би-Си дека Израелските одбранбени сили (ИДФ) го нападнале Лариџани, објави Би-Би-Си. Иранските новински агенции велат дека пораката ќе биде „објавена за неколку минути“.
Во истиот напад е убиен и Голам Реза Солејмани, кој шест години ги водеше иранските сили Басиџ, познат по прекарот „Касапот на режимот“. Под негова директна команда, силите Басиџ ги потиснуваа мирните протести, управуваа со мрежа од тајни центри за тортура, прогонуваа жени и млади луѓе кои бараа основни слободи и редовно користеа боева муниција против невооружени цивили. Инцидентот се смета за голем удар врз моралот на исламистичкиот режим и оперативните способности на неговиот внатрешен безбедносен апарат.
Израелската војска соопшти дека вчера десетици нејзини борбени авиони извршиле истовремени напади врз Техеран, Шираз и Тебриз. Во Техеран, војската соопшти дека биле погодени командни центри на иранските безбедносни сили, вклучувајќи го и седиштето на Министерството за разузнавање и милицијата Басиџ. Цел биле и места за складирање и лансирање беспилотни летала, места за ракети и системи за воздушна одбрана.
Војската, исто така, објави дека цел на напади биле седиштето на Командата за внатрешна безбедност на Иран и складиште за ракети во Шираз, додека системите за воздушна одбрана биле уништени во Тебриз.
Али Лариџани е еден од највлијателните ирански политичари во последните децении и беше близок до убиениот врховен лидер ајатолахот Али Хамнеи. Тој моментално го предводи Врховниот совет за национална безбедност, тело кое ги координира клучните одлуки поврзани со одбраната, нуклеарната програма и надворешната политика. Во минатото, тој беше претседател на иранскиот парламент, министер за култура и главен преговарач во нуклеарните разговори со Западот.
Лариџани се смета за прагматичен конзервативец и еден од луѓето кои имаат големо влијание врз стратешките одлуки на режимот, особено во кризни ситуации. Поради неговата долгогодишна поврзаност со Револуционерната гарда и безбедносните структури, тој често се опишува како дел од најтесниот круг на моќ во Техеран, па секоја потврда дека бил цел на израелски напад би претставувала значаен удар врз политичкото и безбедносното раководство на Иран.