Претседателот на САД, Доналд Трамп, вечерва изјави дека врховниот лидер на Иран, ајатолахот Али Хамнеи, е убиен во американските и израелските напади врз Иран.
Трамп во објава на социјалната мрежа Truth Social изјави дека „Хамнеи, еден од најлошите луѓе во историјата, е мртов“.
„Ова не е само правда за народот на Иран, туку и за сите големи Американци и оние луѓе од многу земји низ целиот свет, кои беа убиени или осакатени од Хамнеи и неговата банда крволочни бандити. Тој не можеше да ги избегне нашите разузнавачки служби и високо софистицираните системи за надзор и, во тесна соработка со Израел, немаше ништо што тој, или другите лидери кои беа убиени заедно со него, можеа да направат“, рече Трамп.
Тој додаде дека тоа е „најголемата шанса за иранскиот народ да ја врати својата земја“.
„Слушаме дека многу од нивните членови на Корпусот на Исламската револуционерна гарда (ИРГЦ), војската и другите безбедносни и полициски сили повеќе не сакаат да се борат и бараат имунитет од нас. Како што реков синоќа – „Сега можат да имаат имунитет, подоцна добиваат само смрт“, рече Трамп.
Трамп рече дека Соединетите Американски Држави се надеваат „дека ИРГЦ и полицијата мирно ќе се обединат со иранските патриоти и ќе работат заедно за да ја вратат земјата до величината што ја заслужува“.
„Тој процес треба да започне наскоро, не само со смртта на Хамнеи, туку земјата, за само еден ден, е во голема мера уништена, па дури и збришана. Сепак, тешкото и прецизно бомбардирање ќе продолжи, континуирано во текот на целата недела или колку што е потребно за да ја постигнеме нашата цел – мир низ целиот Блиски Исток и, всушност, низ целиот свет“, заклучи Трамп.