Музичката сцена е во шок поради ненадејната смрт на Натан Смит, син на светски познатиот рапер и продуцент Лил Џон. Натан, познат на сцената како диџеј Јанг Слејд, почина на 27-годишна возраст, соопшти неговото семејство.
Според медиумските извештаи, младиот музичар бил пријавен за исчезнат на 3 февруари, по што следела неколкудневна интензивна потрага во која учествувале блиски лица и надлежните институции. За жал, потрагата завршила трагично, а веста за неговата смрт подоцна била официјално потврдена од семејството.
Иако јавноста го познаваше како син на славен татко, Натан Смит рано го покажа својот музички талент и изгради сопствено име во индустријата. Со кариера започната уште на 11-годишна возраст, тој стана дел од клубската сцена во Лос Анџелес и Лас Вегас, каде што се истакна со уникатен спој на хип-хоп и електронска музика. Неговите соработки со Лил Џон беа забележителни, но уште поважно – тој успеа да оформи автентичен музички израз.
Причината за смртта засега не е јавно соопштена. Семејството упати апел до медиумите и јавноста да ја почитуваат нивната приватност во овој тежок период.