Поранешниот портпарол на ВМРО-ДПМНЕ, Димче Арсовски денеска побара извинување од СДСМ, откако генералниот секретар на партијата Александар Саша Димитријевиќ денеска го спомена неговото име во врска со фирмата „Дигитал оне“, за која изјави дека добила тендери во вредност од речиси девет милиони евра.
-Денеска СДСМ повторно покажа и докажа дека влијанието од заевизмот и многуте лиценци поделени за одгледување марихуана, се уште владеат во СДСМ. Некое момче во залез на кариера после сериозен пораз на избори, нарекувајќи се втор човек во партијата, јавно се обидел да ме поврзе со некаков си тендер од неколку милиони евра, само и само затоа што сопственикот носел исто презиме како моето, објави Арсовски на Фејсбук.
Тој рече дека не го познава човекот, кој е сопственик на фирмата и побара јавно извинување од СДСМ.
-За да биде детално јасно, ниту го познавам човекот кој е сопственик на фирмата, ниту сум го сретнал, ниту знам како изгледа, ниту ми е роднина по било која основа. Единствено што е исто е презимето. Немам никаква врска со никаков тендер, ниту пак сум имал било каква врска со државни тендери. Иако во прашална форма, моето име и презиме беше споменато на пресот на СДСМ, тенденциозно со намера да ме вовлечат во нивни креатури и да ги манипулираат граѓаните и јавноста, па затоа јавно барам извинување од СДСМ, ако им остана малце достоинство, нагласи Арсовски.
За разлика од нив, додава тој, секој мој прес каде што било изнесено што било како информација, било точно и потврдено, а не како нивниве лаги и измислици.
-Знам дека се уште ги боли што ја изнесував секојдневно вистината за нивниот криминал. Избори и доверба кај народот не се добиваат со тоа што ќе измислувате непостоечки случаеви и интриги за луѓе од ВМРО-ДПМНЕ, туку со напорна работа, реформи и програма. Така победува ВМРО-ДПМНЕ на изборите, со чесно и домаќинско работење, а криминал доколку некаде има, институциите си ја вршат работата и тоа се гледа, напиша Арсовски.
Претходно денеска на прес-конференција генералниот секретар на СДСМ, Александар Саша Димитријевиќ изјави дека фирмата „Дигитал оне“, формирана на крај на август лани, со само двајца работници за една година добила тендери од речиси девет милиони евра.
-Фирма без историја, без искуство, без портфолио – регистрирана за трговија со информатичка и комуникациска опрема добива речиси 9 милиони евра за само 6 месеци. Или по 1,5 милиони евра месечно. Основана е од извесен Кристијан Арсовски и има само двајца вработени. Да, добро слушнавте, 2 вработени, со речиси 9 милиони евра добиени пари од граѓаните. Од шест државни тендери, дури четири се со Генералниот секретаријат на Владата на Мицкоски. И тоа не било какви тендери туку милионски договори, рече Димитријевиќ.
Последниот договор, како што додаде, е рамковна спогодба за софтверски лиценци за виртуелна платформа во вредност од 8 милиони евра.
-Како е можно за толку кратко време фирма со двајца вработени да добијат речиси 9 милиони евра? Ако ова не е класична шема за испумпување на парите на граѓаните преку фирми блиски до власта тогаш што е? И секако, едно од прашањата е дали Кристијан е во роднински врски со поранешниот портпарол на ДПМНЕ, Димса Арсовски? Повикуваме Јавното обвинителство, Финансиската полиција и ДКСК веднаш да регираат, да отворат истрага, истакна тој.
На криминалци не се извинуваме, реагираше СДСМ.
-Скандалот кој СДСМ денеска го објави ги потврдува сите криминални шеми на ДПМНЕ како се крадат парите на граѓаните. Документите се јасни: тендери вредни речиси 9 милиони евра, се дадени на фирма со двајца вработени лица, формирана пред само една година. Четири од шест договори се добиени од Генералниот секретаријат на Владата на Мицкоски. Ова е класична шема за испумпување на пари од граѓаните преку фирми блиски до власта. Не баравме ниту роднинско стебло ниту извод од Димса Арсовски туку да одговори на прашање дали е роднински поврзан. И нема за што да му се извинуваме. Човек без работен стаж коментира нечии кариери? Човек кој лаже и краде бара извинување? СДСМ не се извинува на криминалци. Ниту Груевски и Мијајлков не се со исто презиме па сепак се роднини. Димса не дефокусирај, она што е сигурно: сите вие во ВМРО-ДПМНЕ сте роднини по криминал, се вели во соопштението од партијата.