„Извештаите зад сцената“ што ги доби американскиот претседател Доналд Трамп се причина за откажување на неговата средба со рускиот претседател Владимир Путин во Унгарија, изјави рускиот министер за надворешни работи Сергеј Лавров за италијанскиот весник „Кориере дела Сера“.
„Не знам од каде и од кого дојдоа тајните извештаи до американскиот лидер, по што тој или го одложи или го откажа самитот во Будимпешта“, рече Лавров.
Тој не даде докази, но во исто време ги нарече „лажни“ извештаите дека самитот не се одржал поради вина на Русија.
Лавров рече дека неговата теза наводно е потврдена со хронологијата на настаните по средбата на претседателот во Алјаска.
Според рускиот министер, американскиот концепт за постигнување мир, кој во Москва го презентираше специјалниот претставник на Трамп, Стив Виткоф, наводно се темели на отфрлањето на приемот на Украина во НАТО и признавањето на „територијалната реалност“ од страна на Киев – предавањето на пет окупирани региони под руска контрола.
Лавров истакна дека во Алјаска, Путин дал „позитивен одговор“ на овој концепт и предложил тој да се земе како основа, но Трамп одлучил да се консултира со своите сојузници и на крајот не се вратил на темата.
Според зборовите на министерот, немало реакција дури ни од државниот секретар Марко Рубио, кога се сретнал со Лавров во септември во Њујорк.