Украинскиот претседател Володимир Зеленски ќе мора да отпатува во Москва ако сака да се сретне со рускиот претседател Владимир Путин, повтори шефот на руската дипломатија, Сергеј Лавров.
Тој истакна дека Путин постојано изјавувал дека, и покрај целата историја од последните шест години откако Зеленски дојде на власт, тој останува подготвен да се сретне со него.
„Тој тоа го рече откако Зеленски повика на директна средба. А претседателот Путин одговори дека ако Зеленски сака да се сретне, треба да дојде во Москва; ние ќе ја обезбедиме неговата безбедност“, рече Лавров на прес-конференција по првиот ден од состанокот на министрите за надворешни работи на Г20 во Атланта.
Шефот на украинската дипломатија, Андриј Сибиха, претходно изјави дека Зеленски е подготвен да се сретне со Путин и директно да разговара за територијалните прашања како дел од напорите за завршување на војната, но дека состанокот не може да се одржи во Москва.
Во интервју за финскиот весник „Хелсингин Саномат“, Сибиха рече дека местото на состанокот не е од клучно значење за Киев, под услов да не е Москва или Белорусија, со шеговита забелешка дека и Северна Кореја може да биде исклучена.
Тој ја оцени поканата на Русија до Зеленски да дојде во Москва како „несериозна“.