Полските аеродроми во градовите Радом и Лублин се затворени поради воени воздушни операции, соопшти Полската агенција за воздушен транспорт (PANSA).
Полските воени команданти изјавија дека полските и сојузничките воздухопловни сили започнале операции како одговор на рускиот напад врз објекти во соседна Украина, објави Ројтерс.
„На барање на војската, Полската агенција за воздушен транспорт издаде директива за воведување ограничувања во полскиот воздушен простор, вклучително и привремено затворање на два аеродрома – во Радом и Лублин“, изјави портпаролот на PANSA, Марчин Хадај, за телевизијата TVN24.
„Постојат одредени ограничувања во источниот дел од земјата и авионите во полскиот воздушен простор мора да ја избегнуваат таа област“, рече тој, додавајќи дека аеродромите би можеле да бидат затворени околу еден час.
Тој рече дека воените власти ќе ја донесат конечната одлука.
Земјите на источното крило на НАТО се во состојба на висока готовност за можни повреди на воздушниот простор од септември, кога три руски воени авиони го нарушија естонскиот воздушен простор 12 минути, само неколку дена откако повеќе од 20 руски беспилотни летала влегоа во полскиот воздушен простор.
Полски авиони во вторникот пресретнаа руски авион кој извршуваше извидувачка мисија во меѓународниот воздушен простор над Балтичкото Море, без поднесен план за лет и со исклучен транспондер.