За време на денешниот генерален штрајк во Брисел, на кој полицијата процени дека учествувале 80.000 луѓе, избувнаа судири меѓу дел од демонстрантите и полицијата.
Откако демонстрантите одбија да го напуштат местото на протестот, бриселската полиција употреби водни топови и солзавец за да ги растера, објави бриселскиот весник „Бруселс Тајмс“.
Полициската акција резултираше со неколку апсења, а неколку лица беа повредени и им беше укажана медицинска помош на местото на настанот.
Според официјалните проценки на бриселската полиција, на денешниот штрајк присуствуваа околу 80.000 луѓе, додека синдикатите велат дека бројот на учесници бил значително поголем, околу 140.000.
Денешниот протест го организираат трите најголеми белгиски синдикати, кои сакаат да го изразат своето незадоволство од мерките и буџетските одлуки на федералната влада.
Според синдикатот, протестот е насочен против политиката што подразбира „подолго и понапорно работење“, што предизвикува чувство на неправда и нерамнотежа кај вработените во јавниот сектор.