Палестинската исламистичка група Хамас соопшти дека нема да учествува во официјалното потпишување на договорот во Египет, чија цел е да се стави крај на војната во Газа. „Хамас нема да учествува во процесот на потпишување. Ќе присуствуваат само медијатори, заедно со американски и израелски претставници“, изјавија извори во организацијата.
Покрај САД и Египет, Катар помогна во посредувањето меѓу страните во конфликтот. Израел и Хамас не одржаа директни разговори за завршување на војната во Газа.
Претседателот на САД, Доналд Трамп, планира да отпатува во Египет за официјалното потпишување на договорот меѓу Израел и Хамас. Светските лидери од повеќе од 20 земји ќе присуствуваат на самитот закажан за понеделник во египетското одморалиште Шарм ел Шеик со цел да се стави крај на војната во Појасот Газа, објави египетското претседателство.
Собирот доаѓа откако претходно оваа недела беше постигнат договор за прекин на огнот и ослободување на заложниците меѓу Израел и палестинската милитантна група Хамас, како дел од мировниот план на САД.
Претседателите на САД, Доналд Трамп и на Египет, Абдел Фатах ал-Сиси, ќе бидат копретседатели на состанокот, официјално наречен „Мировен самит во Шарм Ел Шеик“, според претседателското соопштение објавено во саботата навечер.
Самитот има за цел да стави крај на војната во Појасот Газа и да ги зајакне напорите за воспоставување мир и стабилност на Блискиот Исток, се вели во соопштението. Имињата на учесниците не беа официјално објавени.
Францускиот претседател Емануел Макрон и генералниот секретар на ОН, Антонио Гутереш, веќе го потврдија своето учество. Европската Унија ќе биде претставена на самитот во понеделник од претседателот на Европскиот совет, Антонио Коста.
Ќе присуствува и британскиот премиер Кир Стармер. Германскиот канцелар Фридрих Мерц добил покана за учество, според владини извори. Некои медиуми објавија дека ќе бидат присутни и турскиот претседател, премиерите на Шпанија и Пакистан, како и монархот од Бахреин.