„Ништо не е тешко доколку се влезе со чиста мисла и добра намера. За сè треба време, но со добра организација и добар тим верувам дека работите ќе тргнат на подобро, за четири години ќе постигнеме видливи резултати и општина Центар ќе биде подобро место за живеење“, порача кандидатот на Движењето ЗНАМ за градоначалник на Центар, Мирослав Лабудовиќ, во интервјуто за Република.
Лабудовиќ, чија кандидатура е поддржана од ВМРО ДПМНЕ, истакна дека она што му недостига на Центар е поголема хигиена, повеќе зеленило и враќање на мирот, редот и безбедноста за сите жители на општината.
„Мислам дека низ годините заборавивме на хигиената. Мора сериозно одржување на општината, мора сериозен пристап кон хигиената. Не зборувам за отпадот околу контејнерите, зборувам за тоа што се случува низ општината – за отпадот и прашината што не се чистат редовно. Има делови во кои плочниците каде што си играат и растат нашите деца се покриени со смет и прашина.“
Лабудовиќ истакна дека влегол во политиката со искрени и чесни намери и верува дека со своето искуство и знаење може да придонесе во изградбата на подобро и поправедно општество.
„Ако се предадеме – никој ништо не може да направи. Сметам дека секој што има намера да направи нешто добро и позитивни, треба да се вклучи, бидејќи седењето на натпревар на трибините и коментирањето нема ништо да придонесе. Затоа треба сите да се вклучиме и да работиме за доброто на граѓаните и за нашите деца.“
Лабудовиќ е еден од основачите на ЗНАМ, а во моментов е заменик министер за енергетика, рударство и минерални суровини. По професија е електроинженер, а целиот живот го има поминато во општина Центар, каде што живее и денес со своето семејство.