Стартапот за вештачка интелигенција xAI на Елон Маск собра 10 милијарди долари од инвеститори, проценувајќи го стартапот на 200 милијарди долари, изјавија извори за CNBC денес.
Ова е најновиот пример за вртоглавата вредност на компаниите што развиваат основни модели на вештачка интелигенција. Претходно, Antropik собра 13 милијарди долари со проценка од 183 милијарди долари, додека OpenAI, најголемата компанија во индустријата, имаше секундарна продажба на акции што ја процени компанијата на 500 милијарди долари.
Маск претходно собра 10 милијарди долари во јули со проценка од околу 150 милијарди долари преку комбинација од долг и капитал, соопшти Morgan Stanley.
Од таа сума, 5 милијарди долари беа обезбедени преку долг (обврзници и кредити), додека остатокот дојде од стратешки инвестиции во капитал.
Минатиот декември, xAI собра уште 6 милијарди долари за финансирање на развојот на вештачката интелигенција.
Оваа сума требаше да се искористи за развој на суперкомпјутерот „Колосус“, подобрување на четботот Grok и зајакнување на инфраструктурата, така што компанијата може да го зголеми притисокот врз конкурентите Open AI и Antropik.
Маск во мај изјави дека 200.000 графички процесорски единици веќе се инсталирани во центарот за развој на суперкомпјутери „Колосус“ во Мемфис и дека постојат планови за изградба на уште поголем објект со дури милион чипови, објави CNBC.
Сепак, стартапот xAI е заглавен во контроверзии околу инциденти во кои неговиот четбот „Грок“ го фалел Адолф Хитлер и го напаѓал еврејскиот народ, како и еден конкретен случај во кој „Грок“ одговарал на барањата на корисниците со неповрзани коментари за „белиот геноцид“ и Јужна Африка.
Се верува дека „Грок“ исто така заостанува зад моделите „Клауд“ на „Антропик“ и „ГПТ“ на „ОпенАИ“ во однос на можностите и бројот на корисници.
Маск во март објави дека xAI се споил со X, неговата социјална мрежа, во трансакција со акции што ја процени компанијата за вештачка интелигенција на 80 милијарди долари, а компанијата за социјални медиуми на 33 милијарди долари
Маск го купи Твитер за околу 44 милијарди долари во 2022 година, а подоцна го промени името на платформата во X.